Musik: R. Hömig, Bläck Fööss
Texter: R. Hömig, Bläck Fööss
Verlag: De Bläck Fööss Musikverlag GmbH
Jahr: 1986
1. E Schrieve hängk am schwatze Brett, wat jeder durchzelese hät.
Betriebsausfluch wie jedes Johr, Unkel - alles klor.
Joot jeplant am jröne Desch, für jedermann Erscheinungspflich.
Treffpunk pünklich halver nüng - KD-Büro am Rhing.
2. Alles fängk jetz an ze renne, Fräulein Lehmann es am schänge,
weil d'r Jupp ihr em Jedränge aan et Chassis jeit.
D'r Käpt'n bröllt: Kein Panik, ich war Maat auf der TITANIC,
jeder süch zo, dat hä d'r beste Platz an Deck erwisch.
3. Musik fängk ze tröte an, jeder blös, su joot hä kann,
Heidewitzka Kapitän, eetste Rän.
Jeder fuffzehn Böngsche kritt, für die et Wing un Bierche jitt.
Dem Kellner dröpp d'r Schweiß vum Kenn en d'r Wing eren.
Chef jeit an et Mikrofon, wie jedes Johr dat kennt m'r schon,
stich uns Jubilare dann Treuenodel an.
4. Endlich Meddachesse, dausend Mann sin jetz am fresse,
Schnitzel weeden nohjemesse, Ähze afjezallt.
Et Hanni es ene Wetz am maache,
doch d’r Desch es eesch am laache,
als im e Wööschje voll met Mostert en d'r Pudding jitsch.
5. Mann om Clo mät singe Job, freut sich üvver jeden Dopp,
Chef kütt jetz de Trepp erop, Botz noch op.
Endlich Unkel, Schiff ahoi, d'r Käpt'n hät jetz drei Stund frei,
alles stürmp en et Café Kranz, Ententanz.
Polonais, die koß vill Kraff, Chef drink nur noch Bröderschaff,
Fräulein Lehmann vum Versand hält brav dem Jupp sing Hand.
6. Öm sechs Uhr lät et Scheff af, keiner stürt dat en d’r Weetschaff,
doröm fährt die halve Mannschaff jetz op Heimat aan.
Om Scheff weed laut jesunge: „Du kannst nicht treu sein, alter Junge.“
Un manch Paar hät sich jefunge, doch nur bes morje fröh.
Langsam kütt d'r Dom en Sich, un de Musik deit ihr Pflich,
spillt für uns em Ston "Ich mööch ze Fooß noh Kölle jon."